07 Oct Our people : Kas enn poz avek Asha Neehull
Ant de komann fromaz, nou finn zwenn Asha Neehull, enn food operator ek responsab HACCP kot L’Artigiano. Li partaz avek nou so lexperyans, so bann pasion ek sirtou kouma so lazourne pase dan travay. Li enn fwet dan manze morisien, dan so lakaz li mem pilie, e dan so travay tou bizin drwat-drwat. Kot li ale li touzour gard so positivite ek so sourir sirtou kan ena pou motiv so lekip. Li espere ki li resi vwayaze enn zour ek dekouver lot pei, sirtou trouve kot bann prodwi L’Artigiano sorti.
Rakont nou inpe kisana Asha.
Mo apel Asha Neehull. Mo marye, mo abit a Triolet. Fer 7an mo travay L’Artigiano antan-ki food operator ek responsab HACCP. Mo enn mama de zanfan-enn tifi 18an ek enn garson 14an.
Ki rol enn food operator ek responsab HACCP kot L’Artigiano?
Isi mo travay dan laboratwar, kote fre. Mo siperviz enn lekip trwa dimounn, kot mo asire ki nou swiv tou bann prosedir ki bizin pou garanti enn bon kalite servis pou nou bann klian e pou ress konform avek bann norm. Par examp kouma manipil enn zanbon ou swa kouma stok bann prodwi. Mo konn travay-la depi komansman ziska finision! Monn aprann bokou kitsoz kot L’Artigiano, sirtou konn valer enn prodwi, kone kiete sa enn fromaz ouswa enn sarkitri.
Kouma ou lazourne travay pase ?
Premie zafer ki mo fer kan mo rantre, se lav lame bien kouma bizin e tiek tou nou bann materyel. Mo gete si lekip Sales inn donn komann pou prepare. Lerla mo fer briefing avek mo lekip ek nou partaz travay-la ant nou. Mo pa zis siperviz zot me mwa osi mo fer komann, ek faktir, mo fer tou.
Ena enn ti moman ou pli kontan dan ou lazourne travay ?
Kan nou dezene ansam avek bann koleg, nou koze, riye. Isi nou pa santi nou koumadir nou pe travay, li plito koumadir nou pe vinn dan enn deziem lakaz. Nou bien soude, ena koperasion ek kominikasion.
Sinon ki ou kontan fer dan lavi ? Ki ou bann pasion ?
Mo kontan kwi, sirtou bann pla morisien. Toulezour mo bizin prepar mo ti farata. Monn aprann kwi avek mo mama kot monn gard bann tradision mo bann gran-paran. Mo kontan pas letan avek mo fami. Sinon mo bien kontan abiye, makiye, tir foto ek fer tiktok (rires). Mo kontan mo travay osi, mo pa kontan res lakaz.
Ou ena enn filozofi dan lavi ?
Bizin kalm dan lavi, pa fer kitsoz ar koler. E li inportan ki nou touletan kontign grandi.
Pou konklir, eski ou ena enn rev ouswa enn swe ki ou ti anvi realize ?
Mo ti pou kontan voyaze. Al vizit Buckingham Palace ouswa litali. Kouma mo travay l’Artigiano, mo ti anvi al litali, gete kouma li ete laba e kotsa nou bann prodwi sorti. Sinon mo swe pou la konpani se ki L’Artigiano kontigne grandi ek ki nou osi nou grandi ansam.
